day5-last day@神戶大阪

離開倉敷北上大阪，本來打算去環球片場，不過最後大家都話想去shopping多Ｄ，加上落雨，就去左難波行下，果度有條好鬼長既地下街,由車站直通去新既shopping mall﹣難波park。條地下街的確勁長,但無野好行囉,啱阿"蟬"行多d.去到難波park,係就係好新下,但都係無野行，多數有牌子既舖頭，同行又一城差唔多，結果早Ｄ返去梅田行下好過，反而有唔少收獲XD 第二日好好天，晨早坐車去神戶，由新神戶站行去北野異人館度睇異人屋。叫異人館因為以前有好多德國人住係呢區，起左Ｄ好歐陸式既屋，而家呢Ｄ屋裡面都保留住歐陸式既裝修同稼私，俾幾百yen就可以入場參觀。我地個"cheap trip"當然唔會俾錢睇呢Ｄ啦XD 我地無行哂成個異人館,只係去左其中最出名既兩個館，之後行沿異人通落去，經過風見雞本舖，出名賣布丁同樹輪蛋糕，裡面有個識講國語既職員，非常好客地俾我地試暈各種味既布丁，最好味都係銀布丁，又香又滑！買完兼"mouse街"食完布丁後，就繼續行落去神戶最旺既地帶﹣三宮，之前已決定洗幾千yen去食神戶牛柳，行行下見到有間門口有個神戶牛set lunch餐牌，有湯有沙律有牛4880yen，時間唔早就入去食喇，間餐廳好似好高級下，難得個個侍應都識英文，我地坐鐵板位，廚師好細心咁講解食法，佢分幾次牛柳俾我地，第一次只點salt，第二次點salt同特別既檸汁再點Ｄ黑椒粒，第三次就點wasabi，我覺得點黑椒粒同wasabi都好好味！食完就行商店街，本來諗住行去kobe tower果邊，但一來勁攰,二來好鬼遠，三來我張mr.donut point card儲夠分，就到期，屋企人千丁萬囑叫我一定要去換隻pon de lion返黎。所以折返去我地話今次死都唔去既心齍橋（因為去得太多,又無咩行），去到都八點幾，我就拿拿淋走去mr.donut，好在換到姐XD 再買多幾個pon de ring做宵夜添!最後求其搵間食拉麵做最後的晚餐，佢地話超級勁難食喎！好在我胃痛無食到XD
最後一輯既相係呢度睇： http://www.flickr.com/photos/kapark/3130388839/in/set-72157611488373871/

day4@倉敷

第四日晨早離開廣島，出發去倉敷喇！廣島離倉敷大約一個鐘左右既車程，去到放底行季後就去倉敷美觀地區都遊覽。由酒店行十分鐘就到，美觀地區入口有條江戶feel既商店街，都係賣一d傳統食物或物品既舖頭，行入d會見到有條小川，兩邊都種左好多柳樹，街上面有車伕拉人力車載遊客遊覽外，水上面都有著住江戶look既船伕撐艇仔。多懷舊野既關係，好多日本傳統既小食，所以行到邊食到邊，樣樣都好鬼好食！係美觀地區食完lunch後就行返去車站既另一邊﹣chibori 公園，其實係一個遊樂場黎，第一次黎但應該都係最後一次lu。因為呢個遊樂場做埋今年就摺！個遊樂場都唔算細，好多丹麥屋仔，機動遊戲都係最基本果d，佢地玩左過山車，我心血少唔玩得啦，唯有自己周圍影相，日本冬天實在太早日落，四點幾已經開始黃昏，五點幾已經好似七八點咁！之後都有一齊玩坐船仔由高處衝落黎濕哂身果d（我唔知呢d叫咩~)，最後就坐摩天輪睇夜景後就出返去車站果邊食野喇！走左去一間好住家式既食店食syabusyabu，叫左三個餐，有和牛，黑豚肉同海鮮，肉就好食喇，不過個湯底就....超清，係一片昆布加一窩清水!食食下我都頂吾順，要勁到醬油落d湯度先有味d呢！可能太清既關係，唔太飽，食完走左去七仔買我至愛既克勤牌食，咁先夠滿足XD
倉敷既相可以去呢度睇﹣ http://www.flickr.com/photos/kapark/3116157598/in/set-72157611362874260/

day3@廣島+睇安室concert

行程第三日就係去睇安室BEST FICTION tour既演唱會，演唱會六點先開始，所以上半奏去左廣島原子彈爆發既地點，去睇下原爆dome。食完donut早餐後，就由八丁堀出發，撘兩三個電車站就到喇！沿住條河行，過橋後就到平和紀念公園，公園係紀念原爆既死難者，裡面有平和資料紀念館，展出左當時既戰爭同原爆既相片同資料。細個去廣島時入過去睇，今次時間關係，所以無入去睇，只係行左半個平和紀念公園就行去紙屋町行街同食lunch。行到四點左右,我同阿祖就行去廣島green arena睇安室喇，而波仔就自己周圍行。去到會場，第一時間去排隊買tour good先啦，因為晏Ｄ實爆多人，果然買完後無耐,條龍已經排到老遠~場外仲有三個安室VS廣告造型既看板，得個頭埋去就可以扮安室影返張相XD六點鐘左右終於開show，大場的確唔同Ｄ，雖然離個台幾遠下，但成個show都好正，有故事性又有視覺效果，但我唔係係安室既都話正架！安室有幾首歌都譚校長上身，唔記得歌詞就爭d囉XD　睇到八點幾就去返酒店附近join返波仔食晚飯，本來諗住去成棟都係食廣島燒既大廈食，但去到爆多人之餘，有d已經話收工唔做生意，果時先係九點左右，廣島的確清閒好多，食肆遲開早收擋!我地唯有走去附近另一間食廣島燒既食店，但都係要等位，好在等都值得，d廣島燒的確好好味！食完趕去平和大通，因為有聖誕燈飾睇，十一點就熄燈，去到都十點九，唯有走馬看花咁影幾張相，啱啱影到最後果棵聖誕樹，正正十一點就熄燈，日本咩都咁鬼準時~影完就返酒店lu! 聽日就會離開廣島，去倉敷喇！

是日相片去呢度睇啦- http://www.flickr.com/photos/kapark/3107647710/in/set-72157611175816313/

day1&2@広島+宮島

由關西機場坐新幹線到新大阪，再轉另一架新幹線去廣島，到廣島時已經七點幾。酒店揀左係廣島較旺既地方﹣八丁堀，諗住多d野行多d野食。由廣島站坐幾個站既路面電車就到八丁堀。咁啱撞正胡子大祭，成條馬路都變為行人區，兩邊開滿小食既攤擋，我地三隻餓鬼急不及待即刻開始掃街，因為個飛機餐實在太難食~結果呢晚既晚餐就係掃街喇！
第二朝晨早九點離開酒店，尋晚開滿攤擋既街，已經清哂，一舊垃圾都無，比著係香港，清場後都唔會咁乾淨！時間太早，咩都未開，得吉野家開左，咁就去左吉野家食早餐喇，食完撘返電車去廣島站轉車，去宮島口再坐船出發去宮島。一到步，已經見到兩三隻鹿，好鬼得意，又唔驚人，不過隻隻都好胃食，一見你食野飲野就即刻走過黎「炆」衫要你俾野食佢。沿海邊一直行就見到大鳥居，朝早潮水未漲，可以行近大鳥居影相，而世界文化遺產之一既嚴島神社就係隔離，我地又扮高中生買平飛入寺參觀XD。之後求其入左間餐廳食lunch，宮島出名蠔，所以差唔多成個menu都係蠔既食品，平時唔食蠔既我，見咁出名，當然要試下啦！果然好好味，連炸蠔都可以食到鮮味，正！食完之後見到有炭燒蠔同楓葉饅頭，又食過。食完就行去紅葉谷公園，紅葉都係京都最靚呢！之後沿住表參道既商店街行返去碼頭，回程時已經潮漲，我覺得呢個時候既嚴島神社同大島係最靚。返到廣島食完晚飯後，我同阿祖就去左Big Echo唱K，第一次去日本唱K，覺得幾好，入去只要同reception講幾多位同唱幾耐，佢就會俾個有房號既膠牌你，咁我地就自己上去搵房，價錢以時間計算，都無nuts同野飲，如果想叫野飲，就自己係個芒到touch screen order，唱到夠鐘就自己拎返個膠牌去reception埋單就ok，幾方便！每人都係唱左百四蚊左右，相對係香港唱日文K真係平好多呢！

頭兩日既相 http://www.flickr.com/photos/kapark/3088903619/in/set-72157610957092228/

BEST FICTION tour08@広島

今年又去睇安室，已經第四次睇喇，今次唔同d，係arena場，大好多！因為想去宮島，所以揀左去廣島，夾啱時間睇埋安室concert。至於點解想去宮島，事源上年安室做完play tour廣島站後，去左宮島玩，係會刊睇到宮島d鹿好得意，上網睇原來嚴島神社都好靚，就決定去宮島呢！成個行程去左廣島，宮島，倉敷，神戶，大阪。d相都未整理哂，暫時只upload左頭兩日係廣島同宮島既相，大家可以去呢條link睇相呀！
http://www.flickr.com/photos/kapark/collections/