十年前的畫

啱啱係個portfolio袋搵返以前讀design時畫嘅畫，雖然變黃哂，但仲keep得好好，張張A2咁大，果時每張都花左n小時黎畫，每筆都用左唔少心機，而家只會用電腦畫野，要再拎起畫筆畫畫都應該無咩機會，隨即拎部相機影低佢，因為唔知d畫仲可以放多幾多年呢...
水彩
鉛筆掃苗
colour pencil
水彩+針筆

初八私房菜

三條友相約去灣仔新開嘅華星冰室，試下貴格版澳洲牛奶公司，標榜用北海道3.6牛奶，和澳牛一樣，只有叉湯意，炒蛋多士set。結果，以乎名過其實，澳牛雖然平民兼無服務可言，但輪質素，還是澳牛好食多華星多幾條街!食完係cwb行左陣無野做，就打算買餸去我屋企煮野食，因為屋企無人。七點半先正式開波煮，屋企廚房細真係難煮野，加上我阿媽d"砂煲瓦餐"多到爆，一煮野真係無位放，最後煮左日式牛肉鍋，冷烏冬，煎鮮蝦餅，同煎沖繩餃子，搞左兩個幾鐘終於有得食XD 要兩位久等唔好意思下XD 一條友，兩個爐頭，四個餸，係花時間d，下次再整蝦餅的話，我會預早一晚整定蝦膠，唔洗"mock"蝦雕蝦腸side哂d時間XD
一條友"mock"一斤蝦兼雕蝦腸的話，真係有排搞，最後都要波仔幫手雕蝦腸
鮮蝦餅，好耐無整呢味，好在keep到水準
冷烏冬要加冰過冷河，都咪話唔煩XD
鏗魚湯底牛肉鍋，個湯好甜架，但d牛多到食唔哂
急凍沖繩苦瓜餃子，夠方便，呢個阿祖煎嘅

新加坡探親之旅

部電腦終於剷機完成，可以整理d相喇！一連四日嘅探親之旅，第一餐食主家菜，就係去我表姐屋企食佢親手整嘅四餸一湯，之後嘅午餐同晚餐機乎都係表姐安排，最好食嘅一餐係去我表姐夫開嘅酒樓度食晚飯，表姐夫親自下廚，好食過好多香港嘅有名酒樓，勁好食！唔講唔知，原來新加坡係禁止用味精整野食，所以出街食嘅都健康好多！
新年期間去新加坡可以食到好多平時無嘅特色賀年小食，但大多數都係熱氣野，我只係試完唔買XD而最想食嘅海南雞飯，發現最好食嘅唔係出名果d，而係我表姐屋企樓下大牌檔裡面價值$15嘅海南雞飯。新加坡真係無咩好行，感覺上係香港，澳門，大陸嘅混合體，遲d聖濤沙開哂嘅話，淨係聖濤沙都要玩兩日呢！

新加坡探親之旅嘅相，可以去呢度睇--->http://www.flickr.com/photos/kapark/collections/72157623333609371/

偶遇祖藍

四日嘅新加坡探親之旅好快就完結！不過部腦short short地，要遲d先整理d相。係臨飛之前一日，晏奏時一條友走去祖藍嘅「心飴」甜品屋食甜品當午餐，果日仲係試業當中，加上平日晏奏時間，無咩人。甜品選擇頗多，由最普通嘅西米撈，果汁到特色甜品都有！一個疑似經理嘅男人主動問我對食物嘅質素，我突然蔡欄上身，俾左佢唔少好似好專業嘅comment，又話食到有d酒味之類XD　又問佢製法，佢都好樂意講埋用咩材料，都算係咁，有d一句答你秘製就算！之後食食下突然見到祖藍由另一邊門口入黎，我當然爆開心，係咁望住，聽到佢同職員講話趕住去開會，夜d再過黎，隨即出左門口，門口咁啱有個c奶係度望menu，祖藍即刻上前hard sell，呢一刻我鼓起勇氣，問頭先個疑似經理，叫佢問下祖藍可唔可以同我影張相，祖藍拿拿淋同我黎張「快相」後就閃人。可惜疑似經理手震....希望下次有機會可以再同祖藍合照啦！

我對「心飴」嘅食評可以去呢度睇http://www.openrice.com/restaurant/commentdetail.htm?commentid=2061696

向新加坡出發！

而家係機場準備同屋企人去新加坡喇！上一次去已經係n年前，得果五六歲，完全無記憶；今次終於可以食海南雞飯同埋班蘭蛋糕XD星期二晚先返！またね！

心飴

我偶像祖藍係尖東開左間甜品屋，尋日路經雖然仲未開張，但從玻璃睇到廚房裡面嘅甜品師傅們已忙碌地準備中，今日開始做生意喇，試業中，正式開張係10/2。門口貼住餐牌，價錢平均廿幾蚊一款，種類都幾多下，由最一般嘅西米露到心太軟，梳乎里都有，仲有個較特別嘅黑糖系列。尖咀以前真係無咩甜品好食，糖朝同甜蜜蜜都係又貴又麻麻，希望「心飴」會成為尖咀區飯後甜品嘅好去處啦！
位置係港晶中心地下，即係紅磡車站往尖東果條天橋下面
劉華題字嘅「心飴」招牌

我家樓上的史力加

屋企樓上應該有個細路女／仔，而我間房上面亦都應該係呢個細路間房黎，呢個細路唔知係咪有過度活躍症，係的話我反而會體諒下佢，每當佢係屋企，就會暴走、暴跳，有時仲會大叫，每當佢「發顛」嘅時候，你會懷疑史力加係你樓上暴走，超煩厭！仲有唔知係咪佢阿媽，成日著住對有踭嘅拖鞋/涼鞋通屋行，行到cock cock聲，又係超煩！呢d又好難投訴，日抖無得投訴啦，過左十二點的話，佢又比較少會暴走(不過間中都會），以前可能要返工，頂多頂佢呢d嘈音兩個鐘左右，但而家由朝到晚都係咁，晨早七點幾佢地唔知邊個起身又係超嘈，我每日都俾佢定時嘈醒，你話我可以點呢？