iphone電話繩小裝置

iphone無得掛電話繩對我黎講極為唔方便，前排晨早要去沙田新城市廣場set showcase，咁啱果日套衫無袋，但電話又要跟身，唯有做野時放低個電話，就係咁，放低左個電話係個showcase頂，個showcase唔係好高，仲要係透明既，當我記起我放低左個電話時，已經係8-10鐘既時間，即刻飛奔去睇下個電話仲係唔係度，十分好彩，可能朝早人流未咁多，無人發現，不過雖然話早，已經好多大陸人係度行街，一路做野已經有幾個大陸人黎問路。搵得返個電話真係好彩！嚇Q死！其實呢次已經唔係第一次，不過之前留低電話既地方都係公司或者公司舖頭，轉頭都記得拎返，再加上好邪地，係呢日之前兩晚我發夢係唔見左個iphone!　之前係日本見過有d小裝置可以令iphone可以掛電話繩，就拿拿淋上網買，兼買埋電話頸繩，咁第時出街做野，就可以掛起身！條電話頸繩因為有我家姐資助，所以買左條BV頸繩，多謝家姐!!
本來想揀淺啡色，但今季興呢隻橙粉紅，又係新色，就揀左呢隻色喇
就係留左電話係呢個showcase上面，

尋找'她'鄉的fan屎

幾年無去東京,上次去東京係幾年前去北海道轉機回程時留左一曰，血拼購物24小時XD 今次逗留係東京嘅時間同樣好短，只有兩日時間左右，睇安室concert都用左大半日，血拼時間同樣所餘無幾XD 因為今次行程主要目的地係安室鄉下-沖繩
啱啱係機場食完早餐，$32一個翠華炒蛋米粉熱奶茶，勁掠水~17／10凌晨返到香港，掛住我可比send sms俾我架hahaha

阿媽的日本手信

啱啱阿爸同阿媽去完日本立山黑部，阿媽真係醒目兼好細心地買左好多好野俾我！好開心呀！多謝阿媽&阿爸！
絕對不能不買既Mr.donut!!雖然林哂，但我都覺好味！
阿媽知我like藍莓，專登買支藍莓味蜜糖，沖水飲，正！
仲有唔少得既鬆弛熊XD
賣飛佛零食之一，日本棉花糖（鬼佬卡夫牌我唔食架XD）雖然係我最吾like既哈佬吉米，但見係信州限定，咁又唔同haha

霖霖的百日宴

上星期六晩擺左兩圍，慶祝霖霖出世三個月。除左我家姐結婚擺酒外，今次算係我屋企第二次辦喜事。是日最忙果個係我，日抖去我家姐度幫我阿媽同家姐化妝set頭，出到去就要去美心拎訂左既蛋糕，到酒樓就變左攝影師，同親戚影相，由朝忙到晚，食到十一點先散，攰到爆
三磅既摩天輪蛋糕，好靚呀！
酒樓提供既薑同紅雞蛋，自幼稚園生日食過紅雞蛋，大左都無食過lu~

m巾不是我的

以下係一星期前,茶水阿姐走黎我同Iris既位度講...

阿姐:你地d衛生巾唔好未包好就掉落垃圾筒,會"痴"住垃圾袋好難清理.唔知邊個咁做,所以同你地講聲.

我同Iris應左佢就算,阿姐走左後,我同Iris都話不黝都包好先掉架啦!

尋日,茶水阿姐再走過黎同我地講...

阿姐:係咪你地無包好就掉落垃圾筒?

我同Iris:唔係我地呀!

阿姐邊行邊講:以前都無人咁樣,係呢一兩個月先係咁....(暗指係我或Iris啦,因為我同佢係呢幾個月先黎做!)

無啦啦暗食死貓...澄清!未包既m巾唔係我既XD

FAMA Down To Earth Concert

香港歌真係好少聽，張敬軒，eason，G.E.M.同埋農夫，佔itouch個playlist只有兩三成，實在少得很！前三個都係唱得之人，唯獨農夫唔係，點解會聽農夫？等我都rap一rapXD 我未算係農夫既super fans，但佢D新歌我都有聽。可能鐘意聽Hip-hop，鐘意聽佢rap，歌詞到肉又押韻，聽得好過隱XD 講返個show XD，最震撼唔係edison出場，係一身全白addias套裝look 既麥玲玲出場最有noise XD，歌本身係hip hop，但演唱會將好多歌重新編曲，有rock版，都有unplugged，幾新鮮，但rock版感覺奇怪，都係原編好d！後半部有十幾分鐘棟篤笑，的確好笑!!雖然無睇哂全個show（因為第日要返工）但都覺得幾好睇！返而好過張敬軒，實在太悶XD
同宣傳海報一樣既太空農夫從天而降!
一開場有edison唱imagine，d觀眾好大反應，我只顧努力吹我既發光pon pon棒XD

ma ma's day

今年母親節比以往有d唔同,因為家姐坐月中,暫時未出得街,我老豆例必星期日飲完茶就返上大陸,所以今年得我一個陪阿媽過.母親節禮物今年折現,諗少樣XD不過都照舊買花,以前送花唔係o係花墟買未包裝既花,就係臨時先買,記得上年果扎我家姐係百佳買,又平又靚XD今年預早係花店訂,$220節日價算係平靚正!中午去左isquare上面間阿一海景飯店,的確好食之餘仲有270度既維港景,呢餐唔知食左幾錢,只知唔方平XD因為買左飛睇葉問,食完就趕住落去睇戲,老豆埋單.睇完戲就入左廸士尼酒店食自助餐,因為阿媽想去試好耐,而我已經係第三次食,食物水準仍然keep到,唯獨是永遠都只係得mickey, minnie,跳跳虎撐場,影到我都唔想同佢影~唔明點解無唐老鴨,驚佢個pat太大掃跌野,定驚佢白色唔com污漕呢!?
每次d公仔行過,隔離枱個B就會勁驚勁喊,成餐飯d公仔都已避開隔離枱,但個b就算好遠見到都勁喊,乜d公仔真係咁得人驚咩?
老豆推介咸水角果然同出面食既唔同,面果層皮煙靭得黎唔"痴"口,好似食緊草餅咁.
冬瓜切成米奇頭既湯,次次都食唔到,今次終於食到喇!豬頭果個係奶皇包,比我想像中好食!

準備開工！

三個月嘅長假終於要結束，尋日晏奏去左間港資手袋公司見工，一見就係老闆，老闆五十歲左右，極之健談，談天說地，天南地北乜到up,足足見左差唔多兩個鐘...今朝呢間公司打黎話叫我聽日返工，效率奇高!最後因為我後日仲要覆診睇腰，所以改左星期一開工。返工地點係勁唔就腳嘅紅磡，仲要返八點半!! 襯仲有餘下幾日「假期」，拿拿淋去做埋d濕碎野，包括換過哂期嘅回鄉証，去醫生度check眼，睇中醫(因為仍然訓得好差)，做埋d freelance咁~講開見工，由初出黎做野到而家，發覺過往請親我嘅必定係男人，女人in我的話，唔係我唔like份job，就係人地唔請。可能我無女人緣啦！所以連熟嘅朋友都係男性佔九成~啱啱驗完眼返黎，放大瞳孔好鬼辛苦，睇野勁矇，又攰又勁怕光，成隻鬼咁，所以而家睇電視電腦都要帶返副超先舒服，下面呢個浴衣x ray-ban look咁騎呢，即刻用電腦個cam影返張相，唔好睇我好似好精神，除左副鏡就殘到嚇死人XD
平時係屋企就係咁著，試過俾送貨送外賣嘅人見到，佢地第一下都呆一呆，乜好奇怪咩？

擲膠橙

香港真係無咩地方去，加上而家陰陰天濕淋淋嘅天氣，想去影相都難。無聊地諗起幾年前去過嘅林村，果時棵真嘅許願樹仲可以俾人擲橙，而家變左棵膠樹後就未去過，就襯元宵佳節，去湊湊熱鬧！而家嘅林村似乎被粉飾成旅遊景點，以前只有兩三檔買寶碟嘅檔仔，買完寫上心願就擲上樹。而家成條路都開哂檔口仔，連小食都有得賣，傳統嘅寶碟依然保留著，但已經無買寶碟送橙一個，只係寶碟上寫上姓氏同心願就掛在一個類似日本寺廟掛繪馬嘅木架上。要再嘗「擲橙」的話，就要俾$20(好貴~)買一個同棒球般大嘅膠橙連同一張「願望點心紙」，俾你tick心願，之後就可以擲上棵膠樹上，其實真係幾搵笨！肯定佢定期會係膠樹上回收d膠橙再賣過！都係傳統嘅寶碟連橙感覺會靈d!而擲橙嘅難度相比以前都容易得多，呢棵膠樹咁矮，個膠橙又輕，細路哥都擲到上去!以前棵真樹又高，加上用真橙的話，好容易因失手，個橙跌返落黎跌爛個橙，爛左就仲難擲，仲會成手橙汁添XD
就係呢個好膠嘅燈加一張點心紙，成為$20，$20我買到十個橙喇！

我家樓上的史力加

屋企樓上應該有個細路女／仔，而我間房上面亦都應該係呢個細路間房黎，呢個細路唔知係咪有過度活躍症，係的話我反而會體諒下佢，每當佢係屋企，就會暴走、暴跳，有時仲會大叫，每當佢「發顛」嘅時候，你會懷疑史力加係你樓上暴走，超煩厭！仲有唔知係咪佢阿媽，成日著住對有踭嘅拖鞋/涼鞋通屋行，行到cock cock聲，又係超煩！呢d又好難投訴，日抖無得投訴啦，過左十二點的話，佢又比較少會暴走(不過間中都會），以前可能要返工，頂多頂佢呢d嘈音兩個鐘左右，但而家由朝到晚都係咁，晨早七點幾佢地唔知邊個起身又係超嘈，我每日都俾佢定時嘈醒，你話我可以點呢？

食粥五餐

上星期開始一食野就肚痾，其實耐唔耐就係咁，都係d感冒清唔到，腸胃炎感冒菌入腸之類，但今次食完藥都無點好到，前兩日一起身就胃痛痛足成日，六個鐘內食左三種唔同嘅胃藥都無好到，第二日唯有去仁安睇，醫生話如果係腸胃炎的話，無理由咁耐都唔好，佢"襟"我個胃同腸嘅時候都係痛，醫生話如果食左佢d藥都無料到嘅話，最好照下個胃同腸。今日食第三日藥，胃就無再劇痛，但腸都係超脹，已經食粥五餐，戒口真係幾慘，呢幾日除左粥，通粉同麵包係我嘅早午晚餐外，咩都無食，但今日又黎食完野又痾，雖然唔係痾得勁，但真係唔知d腸胃搞咩！真係唔多想照，照胃都還可以，照腸嘅內視鏡要係肛門放個內視鏡入去>O<！年尾的確特別黑，腰又未好，又成日感冒，又訓唔好，而家腸胃又唔知搞咩~快d到新年啦!

大澳兩小時遊

星期六好好天，就出發搵地方影相，最後揀左應該幾歲大時先去過嘅大澳。唔去唔知咁遠，又沙田坐E車去到東涌差唔多一個鐘，再又東涌坐11號巴士去大澳，又要一個鐘，來回差唔多四粒鐘，但逗留嘅時間只有兩個鐘左右XD，其實大澳得條吉慶街叫做有野行，由街頭到街尾都係賣海味，好彩仲有小食賣，有燒魷魚乾，茶果，雞屎藤，仲有賣飛佛嘅雞蛋仔，仲要係炭爐燒嘅，係香港真係絕跡咁濟。
係大澳果條橋度影
黑超阿伯賣嘅炭爐雞蛋仔，製作時間竟然比一般用電熱板嘅仲快!
炭爐整嘅的確別有風味，但口感較稔，似蛋糕仔多d，但反而啱我口味，太脆得個"蛋殼"果d，反而唔係我飛佛！
大澳海邊嘅屋都係長方形一格格，好似貨櫃咁嘅鐵皮屋，呢間我諗係大澳唯一嘅飛髮舖
嫌重，無帶支18-200，結果只係影到細細粒嘅蛋黃仔，"殘念"

東亞小圈子

每年都會到紅館睇世界女排大獎賽，今年多左個東亞運，多左次機會俾我現場睇波。不過東亞運實在太小圈子，基本上都係中國玩哂，日本，韓國，朝鮮，澳門，蒙古，台灣，關島，香港，我諗除左足球係中國嘅弱項外，十居其九嘅項目都係中國奪金，美其名提升運動員水準，使亞洲更團結，咁亞運已足夠，起碼亞運嘅參賽地方多達四十五個，項目也交接近奧運，感覺總比東亞運有意義得多，東亞運變成一個多左少數外國人參予嘅全運會吧！講番前日睇波，排球實情得六個地方參賽，好明顯一定中國贏哂，第二必定係日本同韓國之爭，包尾嘅實係香港或關島XD　中國隊自陳忠和教練離隊後，隊員也大執位，難怪大獎賽成績只能得第五，今次東亞運初賽時已3:0勝日本，意料之內，打得係咪特別好？肯定唔係，只不過對手較弱，平均過190cm嘅中國隊已經贏哂身材，反看日本隊差不多全部係少青隊作賽，真正嘅國家隊並無參加東亞運，可能都覺得東亞運太流，倒不如派d年青球員出賽囉經驗XD
坐係我隔離有一班居港日本人，自製旗仔，ponpon棒，叫足全場がんばれ！為日本打氣，其實都明知輸硬，但每球波都落力叫喊支持，輸波後仲話お疲れさま〜相對港人嘅態度，當對手較弱時，睇得冷靜，相反對方較強時，當中國落後緊，對方又得分時，狂hur嘅聲音過份到，有對方國家事後投訴，其實的確好無禮貌，NBA d人都係狂搖ponpon棒以擾亂對方射波姐，反觀港人態度，贏波叫好，輸波就"小"對方，如其係咁，我相信港人只能夠接受有如東亞運嘅小圈子比賽，中國必定係大贏家!
日本隊雖然平均身高不及中國，要避過"長城"攔網的確十分困難，但估唔到日本少青球員參加國際賽事都咁淡定，耐力又夠，最矚目嘅係今年先加入國家隊，只有18歲嘅扣球手石井優希，真係超強い!相比港隊女排，則越打越"謝"，不是體力不計，而係選手心理同士氣問題。
呢兩隻吉祥物我覺得好似paul黃牙白XD

赤柱吹吹風

上一次去赤柱已經係四年前同Robo去影相，記得果時啱啱買左350D無耐，走去影相。咁啱今次又係啱啱有部50D而去赤柱，本身諗住去high tea，hei返日，彌補中秋果幾日由朝做到晚無抖過。但赤柱嘅tea認真麻麻，個tiramisu set唔好食仲要六十蚊，好在間餐廳環境ok，無無聊聊打下機就坐左成粒幾鐘，好鐘意呢種唔洗睇住時間嘅生活，平日由朝到晚都跟住時間走，我諗要等到退休先有咁嘅生活呢!
呢個碼頭以前去時都未有
越黎越鐘意支定焦，影物件好細膩，又夠大光圈。
件tiramisu好甜，我整都好食過佢~呢張都係用支定焦影嘅，影snap shot一流！
呢張用om嘅wide angle影，變型梗有，但比我果支wide angle變得無咁勁，om其實真係幾好，但吾係咁user friendly囉！
排排坐吹海風~

make up exam

終於上完十堂嘅新娘化妝課程，七月頭考試要兩個鐘內完成新娘妝加set頭，之後半個鐘內要轉晚宴妝同轉髮型。model要自己搵人，最好搵個雙眼皮，頭髮又唔太長嘅女仔,仲要方便得閒俾我約出黎練習，身邊得Dor Dor有呢Ｄ條件，又住得較為近我，可以約出黎練習XD Dor Dor足足俾我遭質左兩日做練習加大半日嘅考試，浪費左成日嘅七一假期，真係十分多謝Dor Dor抽時間，仲忍耐倒我當假頭公仔咁玩haha...好在考試總算順利成功，導師評我同karen化妝都無問題，但set頭時間控制得差，overtime左好多。set頭真係好鬼難，要練多Ｄ先得!而家已經接左Ｄ細job做下，多數係謝師宴嘅妹妹仔，同埋姊妹化妝，係時候要做張咭片，方便做生意haha...名到改埋，叫love puzzle，做熟左先敢接新娘化妝呢，希望可以賺Ｄ外塊幫補下啦XD 淨係買Ｄ化妝品同工具都洗左二千幾~ btw 打電話黎想化妝嘅咩人都有，有男仔話想化妝for謝師宴，更有打黎想幫六個北姑化妝....超奇怪XD
時間緊迫，努力中!
婚紗妝唔會太濃，粉橙色好襯Dor Dor!
轉左晚妝，揀左紫色，轉埋個頭同眼影。

can't sleep, can't eat, I'm sick

安室首can't sleep, can't eat, I'm sick，係拍拖諗仔搞到食唔安訓唔落。但我自覺無咩唔開心，工作又唔算大壓力，但都嚴重失眠，一係就訓唔著，一係訓得著但勁醒，可以一晚醒七八次都有，連放假都係咁，連最易訓嘅撘車撘船我都係訓唔著，七日裡面有五晚都係咁，其餘果兩晚係因為食左安眠藥先訓得較為正常。訓唔到影響好大，抵抗力差，易病唔洗講。個人超級溫溫燉燉，專注力超差，莫講話工作，連上網睇雜誌嘅精神都無，前排去襟錢又唔記得拎錢，無左四舊水...。N咁多個朋友同事成日都話「你又唔舒服呀？」「點解你成日訓唔到or訓唔好」答到我都唔想答。其實好簡單，都係因為睡眠質素唔好，咁咪易頭暈身興囉！但點解訓吾好我都想知，上網睇過關於睡眠嘅資料，先知點解有人訓四個鐘都好精神，我訓十個鐘都好似無訓過咁。

咩係睡眠？
睡眠分三段，淺睡，深睡和快速動眼期(REM)，REM是發夢時段，而深睡大約為90mins，也就是身心正式休息，恢復體力的時候，如果有些人一晚之內醒來兩次或以上，他們可能根本沒有深睡，早起來後同樣十分疲倦。（我諗我就係呢種~)

失眠影響
思考力減退，警覺力與判斷力下降，面對壓力時會表現得無所適從，甚至混亂。抵抗力下降，容易患上感冒，傳染病，腸胃病等。（以上嘅我全部中哂=_=")

如果你每晚都可以一撻落床就可以訓著的話，真係好幸福呢!

mama's day

年年母親節不外乎都係飲茶，唱K或者去太古行apita+吉豬島（我阿媽好like行~)，今年節目都差唔多，唯一特別少少就係夜晚去左西貢食海鮮，出名嘅全記，通記聽聞好貴都唔係咁好食，所以揀左間朋友食過都話幾好嘅六福菜館。雖然訂左星期六晚，但六點鐘果輪晚市都full哂，母親節嘅關係，基本上無menu，個個都係點海鮮，我地叫左清蒸象拔蚌，芝士焗龍蝦，蒸海魚，風沙雞，上湯菜心，最後見枱枱都叫沙薑雞腳，就叫左碟黎試下！果然雞腳煮得入味又夠林，好味:P食完海鮮再去左甜源居食甜品!至於今年嘅母親節禮物就係高清錄影機，因為睇電視係我阿媽唯一嘅嗜好，除左新聞同港台節目佢無錄外，咩都錄黎睇...就因為咁，d錄影帶多到有幾十餅，為免太多錄影帶左住個電視櫃，就決定買高清錄影機喇！
清蒸象拔蚌，好甜好味!
芝士焗龍蝦，芝士汁比平時酒樓食到嘅清淡，反而幾好，唔漏之餘用d汁黎撈飯都得！
呢間菜館嘅招牌菜之一風沙雞，個人黎講對雞興趣不大，但呢隻又幾好味喎！

long time no see

同dor dor耐唔耐都會出黎食下飯，其實都起碼幾個月先見一次...因為我實在太懶約人，一係就好忙，忙完又懶得約人出黎，令願抖下:P　所以就算好close嘅friend，都好少見...今次同dor dor 食飯，特別想叫埋有成兩年無見嘅penny，因為佢七月就去北海道讀日文lu（羨ましい~超羨慕~)，係和民叫左個二人餐都鬼咁多野食，有刺身、壽司、沙律、湯麵、熱鍋豬排，特飲，份量都唔少，足夠三個女仔食!唔係間間和民都好食，太陽廣場呢間又ok喎！食完仲叫埋甜品添，邊食邊吹水，唔經唔覺都吹到十點鐘先走呢！

P.S to penny:我會盡量訓練dor dor架喇，希望下年你返黎時會見到一個硬淨d，唔會嗲聲嗲氣嘅dor dor XDD

食野前影返張合照先~
加$10嘅寒天小丸子抺茶雪糕，超抵！
有紅豆係裡面嘅pancake，有d似豆沙鍋餅XD

伊藤由奈 HK mini concert

好難得又有日本歌手黎香港，C3日本動玩博覽係九展舉行，其中請左主唱GUNDAM00片尾曲Trust You嘅伊藤由奈黎開左個超mini嘅concert。早前有消息話會唱大約90分鐘(實情唱左半個鐘)，入場卷要$300，雖然三舊水嘅演唱會，係香港起碼可以聽足三個鐘。但我又唔覺得好貴，因為日本歌手開concert都係唱兩個中左右，一張飛要五六百蚊，所以好多去睇呢個mini concert嘅香港人抱住$300起碼聽足兩三個鐘嘅諗法而失望。講返個concert，係九展演講廳舉行，會場好細，可以好近咁睇到yuna，八點半左右，著住條綠色one piece裙高踭鞋嘅yuna慢慢行出黎，係夏威夷大嘅yuna當然用流利嘅英文同觀眾打招呼，仲用講左幾句廣東話添，之後就唱左以下幾首歌...

1.Precious　(瞭亮嘅聲線，全場靜哂咁聽，呢首歌少d氣都唱唔到，的確係實力嘅表現！)
2.Brand New World (收錄於最新single"Trust You"裡面嘅一首輕快歌曲，yuna叫全場起身跟住拍子拍手，估唔到會唱呢首...)
3.今でも会いたいよ　(同嘉賓陳栢宇合唱，無啦啦彈個陳栢宇出黎，有點格格不入）
4.Trust You (GUNDAM00片尾曲唔洗講一定會唱)
之後同幾個fans玩左個估歌仔game就全場叫encore...跟住就唱左最後一首，應該係半首先啱
5.Endless Story (首本名曲，清唱半首，但高音部份竟然唱唔到~呢段我偷拍左hehee...下面有得睇)

yuna唱Trust You時喊左黎，莫非座我後面果十個八個fans令佢好感動？完場後，觀眾可以係場外買yuna嘅唱片後排隊等yuna簽名，日本好少可以咁好賣大包任簽名呢！yuna嘅fans真幸福~
一貫曲髮look+長裙嘅yuna，

激似李珊珊，不過真人無咁大隻XD

主持介紹話請到jason chan做嘉賓，我都唔知邊個係jason chan，eason chan就唔同XD，陳栢宇出場時當然無咩大歡呼聲啦，怇唱嘅部份好少，所以專注力都係放係yuna度。


Endless Story我諗yuna都唱左n咁多次，以佢嘅實力估唔到唱到高音部份會甩甩地，不過整個concert都唱得好好!

胃酸倒流

上星期五晚訓覺時不停有胃氣湧上黎，每下胃氣湧上黎時胸口都會痛，第二朝起身就感覺到好似有野梗住係食道咁，飲好多水感覺如是。之後不論吞口水，飲水食野，每當食物吞到落胃後，胸口又會痛一下，成餐飯吞幾十啖，就痛幾十下....一直以來胃氣都比較多，近月黎胃酸都成日湧上黎，我諗呢d都係胃酸倒流嘅先兆。再上網睇有關資料，胸口痛係最明顯嘅病徵，尋晚走去睇醫生。d藥好似無咩料到咁~好多人問我咩係胃酸倒流？咩人會胃酸倒流？有咩病徵？最簡短嘅答案如下：

咩係胃酸倒流？
食道末端與胃部之間防止胃酸倒流的賁門鬆了，不能正常關上，令到胃酸可以沖上食道，形成胃酸倒流。

病徵：
胸口灼熱疼痛，喉部感到有異物，長期喉嚨痛，咳嗽，氣喘等徵狀。

咩人會胃酸倒流？
多煙酒，飲食唔定時，成日食宵夜，壓力大，時常食得過飽，過份肥胖等等。

我唔煙唔酒，食野算定時，又無食宵夜，唔係過肥，壓力人人都有，唔算好大，但點解我都會有胃酸倒流呢？mm.....時常食得太飽呢~我都係架XD睇黎我呢排真係要食粥三餐喇...