腰傷腳痛（前言）

六七年前去紅館睇女排，走既時候落雨，當落隊道落到最後一級樓梯時，因為顧住收遮，一唔小心就「扇」倒，雖然只係一級樓梯，但可能地下濕,"扇"得特別勁，我坐低係地下時，係有幾秒係睇唔到野，白色一遍，坐左陣先起得身。之後去睇跌打，兩三個月左就好返，無痛喇！直至年半前開始覺得隻右腳扯得好厲害，再睇醫生先知原來關我條腰事。係呢年半裡，睇過無數咁多中西醫，入過廠照MRI（磁力共震），做過物理治療，針灸，艾灸，跌打，推拿，做機（一部唔知咩機，效果幾好，但做一次要幾千蚊！），加埋睇左8個醫師+醫生=_="，最後都係時好時唔好，無根治到。直至上年年尾，同事介紹我睇一間經絡醫師，我同事同我嘅症狀差唔多，佢睇好左，但就睇左萬幾蚊。雖然好貴，見佢好返我唯有試下啦！第一次上去，會安排見一個女醫師鄔教授（來頭好似好勁，尋找隱世醫術介紹過），佢會睇你嘅x光片MRI片，診症之後會安排做推拿+治療（用脈衝機貼穴位），當做夠5次推拿+治療，令d筋健鬆左，就可以安排「復位」（即係將移左位嘅骨推返正），而復位後，又一定要連續5日做治療，目的係固定被移位骨。而每次復位基本上只可以復一個位，而每復完一次後，大約要兩星期後先可以再復位。價錢方面，推拿+治療有package咁買，每樣十次要$3600，而復位大約$1500-$1800一次，要視乎復咩位置。而我嘅問題主要係腰嘅椎間盤受損，咁啱壓住右腳神經，所以右腳會扯住痛。嚴重嘅話，莫講話彎腰，連腳都會麻痺，行都行唔到，訓覺會痛到訓唔到，連打乞嗤，咳都會痛。所以腰傷的確唔同一般扭親手腳，唔醫後患無窮...

兩椎之間就叫椎間盤，內有軟骨、神經...我就係最尾腰4,5移左位