東京<沖繩 Day3@沖繩中部

係宜野灣check out後就返那霸取車,開始第一日既自駕遊.黑色既本田vitz,舊舊地,連個GPS都舊過人,摸左一輪先開得車XD 先去中部偏東,連接勝連半島及伊計島既海中道路,又長又直既海中道路,可以隨時停車睇下風景,甚至落海戲水都得,兩邊無building,只有海同天,係自駕遊必到既地方.沿住海中道路走,中途會見到海之駅,可以係度食下野買下手信休息下.食過lunch後,再往伊計島方向走,走到最未端既大泊海灘,大泊只係一個好細又偏僻既海灘,但旅遊書同日文同學都推介呢個beach,所以去睇下.可惜天陰陰,又開始晏,失色不少,但如果好天的話,的確會幾靚.逗留左幾個字後,本打算趕返去勝連半島果邊既製塩所參觀,可惜唔知係咪個GPS太唔update,就算入左製塩所個電話號碼,去到目的地都唔係製塩所,兜多兩兜己經5:30,製塩所都收工...最後去左附近世界遺產之一- 勝連城跡行下.勝連城跡有三層,係一個石城堡,經過頗斜既斜路同長長既木梯後,終於上到第一層,其實三層都係石頭砌出黎既城台,但上到最高一層,可以360度望哂整個東南邊既沖繩同津堅島,日抖黎應該景色會靚d!最後渣返架車去那霸還車,再一次被個豬ps玩死,同樣入左租車公司既電話,去到並唔係租車公司,離還車時間只有十分鐘(遲左要罰錢),好在手上有好幾本沖繩旅遊書,都係日本既旅遊書有用,搵到租車公司附近既酒店,用酒店既電話號碼輸入,終於搵到,其實都遲左15分鐘,職員都準備拉閘收工,好在趕得切兼唔洗罰錢.還完車行返出國際通,搵左間居酒屋食返餐地道沖繩菜.沖繩既苦瓜真係幾好食,只係有輕微既甘甘地味,不過係沖繩最好食既,係之後兩日食到既石垣牛同黑豚肉!
萬座毛，車程遠，但逗留時間其實好少，但咁出名無理由唔黎呢！
勝連城跡第三層
dinner係國際通「輪」居酒屋食，呢個和牛壽司唔貴又好食！
黎沖繩一定要食下苦瓜，唔同中國果d咁苦，只係甘甘地，爽口d！

其他Day3既相可以去呢度睇 http://www.flickr.com/photos/kapark/sets/72157625221707192/